गोवा-कर्नाटक सीमेजवळील लक्ष्मी हॉटेलजवळ शनिवारी सकाळी भीषण अपघाताची घटना घडली. कर्नाटकातील मालवाहू ट्रक चालकाचा वाहनावरील ताबा सुटल्याने ट्रक रस्त्यालगत असलेल्या मोठ्या झाडावर जोरदार धडकला. धडकेची तीव्रता एवढी होती की, वाहनाच्या पुढील केबिनचा पूर्णपणे चुराडा झाला आणि चालकासह दोघे जण आतमध्ये अडकून पडले.

अपघाताची माहिती मिळताच वाळपई अग्निशमन दलाचे अधिकारी व जवानांनी घटनास्थळी तातडीने धाव घेतली. हायड्रॉलिक स्टूल्स व लाईटच्या सहाय्याने जवळपास दोन तास चाललेल्या प्रयत्नांनंतर केबिनमध्ये अडकलेल्या दोघांनाही सुखरूप बाहेर काढण्यात अग्निशमन दलाला यश आले. बचाव कार्यादरम्यान दोघांचीही प्रकृती स्थिर असून, त्यांना तातडीने वैद्यकीय उपचारासाठी जवळच्या रुग्णालयात हलवण्यात आले.

या अपघातात ट्रकचे सुमारे १० लाखांचे मोठे नुकसान झाले आहे. सुदैवाने, तात्काळ मदत आणि तडाखेबंद बचावकार्यामुळे दोन जीव वाचले. दरम्यान, या प्रकरणाचा अधिक तपास स्थानिक पोलिसांकडून सुरू आहे.