काकोडा: गोव्यातील काकोडा येथील २१ वर्षीय जॅनामिका परेरा हिने पायलट बनून एक प्रेरणादायी यश संपादन केले आहे. लहानपणापासूनच आकाशात भरारी घेण्याचं स्वप्न पाहणाऱ्या जॅनामिकाने आपले ध्येय साध्य केले असून, तिच्या या यशाने कुटुंबासह गोव्याचं नाव मोठं केलं आहे.

विज्ञान शाखेतून १२ वीचे शिक्षण पूर्ण केल्यानंतर, जॅनामिकाने पायलट होण्याच्या दिशेने पहिले पाऊल टाकले. पुढील प्रशिक्षणासाठी ती मुंबईला रवाना झाली. तिथे तिने दीड वर्ष कठोर प्रशिक्षण घेतले. या प्रवासात तिच्या कुटुंबाने, विशेषतः आई-वडिलांनी तिला मोठा पाठिंबा दिला. "या संपूर्ण प्रवासात माझ्या आई-वडिलांनी आणि कुटुंबाने मला खूप मदत केली," असे जॅनामिकाने सांगितले.

जॅनामिकाच्या यशाबद्दल तिचे आई-वडील खूप आनंदी आहेत. “आमच्या मुलीने काहीतरी वेगळं करून दाखवलं, याचा आम्हाला अभिमान आहे,” असे म्हणत त्यांनी तिची पाठ थोपटली. सामान्यतः मुलींनी निवड न करणाऱ्या या क्षेत्रात मिळालेल्या यशाबद्दल तिचे सर्वत्र कौतुक होत आहे.