पेडणे: उगवे येथे सोमवारी मध्यरात्री तेरेखोल नदीत होडीतून रेती उपसा करणाऱ्या मजुरांवर झालेल्या गोळीबारात दोन मजूर गंभीर जखमी झाले असून उपचारासाठी त्यांना बांबोळी येथील गोवा वैद्यकीय महाविद्यालयात दाखल करण्यात आले आहे.

जखमी झालेल्यांत रमेश पासवान व लालबहादूर गोंड अशी या कामगारांची नावे आहेत. या जखमींमधील एकाच्या मानेला घासून बंदुकीच्या गोळ्या गेल्या तर दुसऱ्या कामगाराच्या दंडाला गोळ्या लागलेल्या आहेत. त्यातील एकावर तातडीची शस्त्रक्रिया सुरू आहे.

घटनेची माहिती सकाळी सर्वत्र पसरल्यावर लोकांमध्ये चर्चा सुरू झाली. हा प्रकार कसा घडला या संदर्भात तर्क काढले जात आहेत. परिसरात बेकायदा वाळू उत्खनन होते. ते मूळ कारण आहे का, याचाही अदमास घेतला जात आहे.

अज्ञात हल्लेखोराचा शोध सुरू

गोळीबार कुणी केला?, नदीतून रेती काढण्यावर बंदी असताना नदीत कसा काय रेती उपसा करण्यात येत होता, अशा बाबींचा पेडणे पोलिस शोध घेत आहेत. गोळीबार करणाऱ्या अज्ञाताचा पोलिस शोध घेत आहेत.