डिचोली: गोवा डेअरीच्या आमसभेत सादर केलेला ताळेबंद ‘बोगस’ असून या ताळेबंदात दाखविण्यात आलेला नफा कृत्रिम आहे. तसेच मार्केटिंग विभागाच्या प्रमुखपदी एस. मास्कारेन्हस यांची केलेली नियुक्तीही बेकायदेशीर असल्याचा आरोप गोवा डेअरीचे सभासद असलेल्या डिचोलीतील नानोडा आणि आमठाणे दूध उत्पादक सहकारी सोसायटीचे अध्यक्ष अनुक्रमे प्रमोद सिद्ध्ये आणि वैभव परब यांनी केला आहे.

या बेकायदेशीर कृत्यांची सखोल चौकशी करुन आवश्यक ती कारवाई करावी. ताळेबंद रद्द करुन सुधारीत ताळेबंद तयार करावा. ऑडिटरवर कारवाई करावी, अशी मागणी दूध उत्पादक संस्थांनी केली आहे. यासंबंधी सहकार निबंधक आणि अन्य संबंधितांना निवेदन देण्यात आल्याची माहितीही प्रमोद सिद्ध्ये यांनी दिली आहे. गोवा डेअरीचा कारभार जाग्यार घालण्यासाठी ही संस्था दूध उत्पादक शेतकऱ्यांच्या हातात द्यावी. अशी मागणी प्रमोद सिद्ध्ये आणि वैभव परब यांनी केली आहे. दरम्यान, गोवा डेअरीचे चेअरमन पराग नगर्शेकर आणि लेखापाल रुक्मा बोरकर यांच्या मदतीने ऑडिटर व्यंकटेश शेनॉय यांनी गोवा डेअरीचा २०२४-२५ या वर्षाकरीता ताळेबंद तयार करण्यात आला. मात्र या ताळेबंदात कृत्रिम नफा दाखविण्यात आला.

शेतकऱ्यांच्या ताब्यात द्या

गोवा डेअरीच्या कारभारावर कोणाचेच नियंत्रण नसल्याने संस्थेत मनमानी कारभार चालत आहे. २०२४-२५ वर्षीचा ताळेबंद पाहता आणि अंदाधुंद कारभार पाहता गोवा डेअरीची अवस्था अत्यंत बिकट होत चालली आहे, असा दावा प्रमोद सिद्ध्ये आणि वैभव परब यांनी केला आहे. गोवा डेअरीला ''अच्छे दिन'' आणायचे असल्यास ही संस्था दूध उत्पादक शेतकऱ्यांच्या हातात द्यावी, अशी त्यांनी केली.