गोव्यामध्ये ड्रग्जविरोधी मोहिमेत पोलिसांनी 2025 या वर्षात मोठी कामगिरी केली आहे. गोवा पोलिसांनी वर्षभरात तब्बल 78.48 कोटी रुपयांचे अमली पदार्थ जप्त केले असून, याप्रकरणी एकूण 212 आरोपींना अटक केली आहे. जप्त करण्यात आलेल्या साठ्यात चरस, कोकेन, एमडीएमए आणि गांजा यांसारख्या घातक अमली पदार्थांचा समावेश आहे. पर्यटनस्थळे आणि किनारपट्टी भागावर विशेष लक्ष केंद्रित करुन ही कारवाई करण्यात आली. अमली पदार्थ मुक्त गोवा मोहिमेअंतर्गत पोलिसांनी राबवलेल्या कठोर अंमलबजावणीमुळे गुन्हेगारांचे धाबे दणाणले आहेत. या कारवाईत स्थानिक आरोपींसोबतच अनेक विदेशी नागरिकांचाही समावेश असून, अमली पदार्थांचे नेटवर्क उद्ध्वस्त करण्यासाठी पोलीस प्रशासन सक्रिय झाले आहे.