गोव्याला पावसाने अक्षरश: झोडपून काढले. अनेक ठिकाणी रस्ते खचले, दरडी कोसळल्या, विजेचे खांब कोसळले. वाहतूक ठप्प झाली. राज्यात सध्या गंभीर परिस्थिती आहे. दोन्ही जिल्ह्यात पावसामुळे मोठे नुकसान झाले आहे. विशेष म्हणजे, यामधून सरकारचा हालगर्जीपणा पुन्हा एकदा चव्हाट्यावर आला. सरकारची खप्पा मर्जी असणाऱ्या कंत्राटदारांना रस्त्यांची कामे देण्यात आली. मात्र त्यांच्या हलक्या दर्जांच्या कामांमुळे रस्त्यांची वाट लागली. गोव्यातून जाणाऱ्या राष्ट्रीय महामार्गांवर मोठ्याप्रमाणात दरडी कोसळल्या. यामुळे मोठी वाहतूक कोंडी झाली, भ्रष्टाचारी भाजप सरकारने गोवा बुडवला, असे विरोधी पक्षनेते युरी आलेमाव म्हणाले.

पुढे कॉंग्रेस प्रदेशाध्यक्ष अमित पाटकर यांनी सरकारवर सडकून टीका केली. सरकारच्या हालगर्जीपणामुळे गोव्याची वाट लागली असे यावेळी पाटकर म्हणाले. पाटकर पुढे म्हणाले की, 'अधिकाअधिक गोवा सरकारचे प्रकल्प मग ज्यामध्ये बांबोळी ते पत्रादेवी हायवे असो, फोंडा बायपास असो, वेर्णा ते कुठ्ठाळी बायपास असो इथे दरडी कोसळल्याने वाहतूक ठप्प झाली. विशेष म्हणजे, पेडणेमध्ये दर पावसाळ्यात दरडी कोसळण्यासारख्या घटना पाहायला मिळतात. कंत्राटदार आणि सरकार यांच्यातील लागेबंधामुळे गोव्याची दुरावस्था या पावसाळ्यात पाहायला मिळाली.'