Anmod Ghat

फोंडा: अनमोड मार्गे बेळगाव ते गोवा दरम्यानचा सुमारे सात किलोमीटरचा रस्ता अतिशय खराब झाल्यामुळे या मार्गाने वाहतूक करणे जिकिरीचे झाले असून हा रस्ता त्वरित दुरुस्त करावा, अशी मागणी कृषिमंत्री रवी नाईक यांनी केंद्रीय रस्ते आणि महामार्ग खात्याचे मंत्री नितीन गडकरी यांना केली होती. त्यानुसार एप्रिलपर्यंत हा रस्ता पूर्णपणे दुरुस्त केला जाईल अशी हमी केंद्रीय मंत्री गडकरी यांनी नाईक यांना दिली आहे.

तिनईघाट ते अनमोड येथील सात किलोमीटरचा रस्ता अतिशय खराब झाल्यामुळे बेळगावहून गोव्यात होणारी मालवाहतूक तसेच प्रवासी वाहनांना अतिशय त्रास सहन करावा लागत आहे. वाहने खराब होण्याचे प्रकार घडत असल्याने हा रस्ता त्वरित दुरुस्त करावा, अशी मागणी रवी नाईक यांनी केली होती.

यासंबंधी नाईक यांनी १९ ऑक्टोबरला केंद्रीय मंत्री नितीन गडकरी यांना पत्र पाठविले होते. त्याची दखल घेत गडकरी यांनी नाईक यांना २ नोव्हेंबरला पत्र पाठविले. आता १८ नोव्हेंबरला गडकरी यांनी पुन्हा पाठविलेल्या पत्रात यासंबंधीचे काम सुरू झाल्याचे नमूद करून एप्रिलपर्यंत हे काम पूर्ण करण्यात येईल, अशी हमी दिली आहे.