फोंडा: पणसुले धारबांदोडा येथील मुख्य रस्त्यावर रविवारी रात्री भरधाव कारगाडीची ट्रकला जोरदार धडक बसल्याने या अपघातातील जखमी कारचालकाचे निधन झाले. या कारचालकाचे नाव उत्तम सिन्हा (वय २३) असे असून तो हवेली कुर्टी येथील रहिवासी आहे.

रविवारी (०८ जून) मोलेहून फोंड्याच्या दिशेने येणाऱ्या जीए ०५ डी ४०४६ या क्रमांकाच्या भरधाव कारगाडीची धडक पणसुले येथे रस्त्यावर थांबलेल्या केए ३० ए ६२१३ या क्रमांकाच्या मालवाहू ट्रकला बसली.

अपघातात गंभीर जखमी उत्तम सिन्हा या कारचालकाला सुरवातीला तिस्क येथील आरोग्य केंद्रात उपचारासाठी दाखल करण्यात आले, तेथून त्याला बांबोळी इस्पितळात अधिक उपचारासाठी नेण्यात आले. मात्र, तेथे त्याचे निधन झाले. फोंडा पोलिसांनी अपघाताचा पंचनामा केला.