गोव्यात मासे खाणाऱ्यांना सध्या मोठा फटका बसला आहे. अवकाळी पावसामुळे समुद्रात मासेमारीसाठी जाणाऱ्या बोटींना अडथळा निर्माण झाला असून, त्यामुळे बाजारात ताज्या माशांचा पुरवठा मोठ्या प्रमाणात घटला आहे. या कमतरतेचा थेट परिणाम माशांच्या दरांवर झाला असून, सुरमई, पापलेट आणि कोळंबी यांचे दर अक्षरशः आकाशाला भिडले आहेत. मासेमारी करणाऱ्या बोटींनी गेल्या काही दिवसांपासून समुद्रात न जाण्याचा निर्णय घेतल्याने बाजारात माशांची कमतरता जाणवू लागली आहे.