सत्तरी: राज्यातील सत्तरी तालुका हा वनराई आणि पर्यावरणासाठी ओळखला जातो. सध्या गरमीच्या दिवसांत अनेक ठिकाणहून पर्यटक इथे भेट देतात. सत्तरीत वाळवंटी नदीवर ‘उभो गुणो’ नावाची एक जागा बरीच प्रसिद्ध आह, इथे गरमीच्या हंगामात लोकं अंघोळ करण्यासाठी येतात. मात्र मोर्ले पंचायतीकडून ‘उभो गुणो’ इथे पर्यटकांच्या येण्यावर बंदी घालण्याची मागणी केलीये.

पर्यटक इथे येतात आणि अन्न शिजवून खातात मात्र राहिलेले पदार्थ, प्लास्टिकच्या पिशव्या तशाच मागे टाकून जातात. यामुळे पर्यावरणाचं मोठ्या प्रमाणात नुकसान होतंय. अनेकवेळा रात्री-अपरात्री देखील पर्यटकांचा गोंधळ आणि धिंगाणा सुरूच असतो, यामुळे स्थानिकांना त्रास होत असल्याची चिंता व्यक्त करत त्यांनी पर्यटकांच्या ‘उभो गुणो’ या ठिकाणी येण्यावर बंदी घालावी अशी मागणी केलीये.

काहीवेळा येणारे काही तरुण पर्यटक दारूच्या नशेत नदीत उतरतात आणि म्हणूनच नदीत बुडून मृत्यू होण्याची प्रकरणं देखील वाढत असल्याचं स्थानी म्हणाले आहेत तसेच त्यांच्याकडून सत्तरीच्या उपजिल्हाधिकाऱ्यांना लिखित निवेदन सादर करण्यात आलंय.

नदीच्या पात्राची खोली नेमकी किती आहे याचा अंदाज कोणालाही नाही, यापूर्वी देखील एका १६ वर्षीय तरुणाचा नदीत बुडून दुर्दैवी अंत झाला होता आणि आता आणखीन अशी प्रकरणं होऊ नयेत म्हणून मोर्लेचे सरपंच अमित शिरोडकर यांनी पर्यटकांना इथे न येण्याची विनंती केली आहे.