गोव्यात हिंस्र कुत्रे पाळण्यास पूर्णपणे बंदी घातली जाणार आहे. असे कुत्रे गोव्यात आणूच नयेत यासाठी पशुवैद्य खात्याला सूचना दिली जाईल. तसेच सध्या ज्यांच्याकडे अशा प्रकारचे कुत्रे आहेत, त्यांच्याकडून जबाबदारीचे प्रतिज्ञापत्र घेतले जाणार आहे, असे मुख्यमंत्री डॉ. प्रमोद सावंत यांनी साखळी येथे पत्रकारांशी बोलताना सांगितले.

कोणाचाही कुत्रे पाळण्याचा छंद एखाद्या व्यक्तीचा जीव घेणारा ठरू नये, यासाठी काळजी घेण्याची गरज आहे. हणजूण येथे कुत्र्याच्या हल्ल्यात एका लहान मुलाचा मृत्यू होणे ही मनाला वेदना देणारी घटना आहे, असे मुख्यमंत्री डॉ. सावंत यांनी सांगितले.