धारबांदोडा येथील बंद पडलेल्या संजीवनी सहकारी साखर कारखान्याच्या परिसरात आज दुपारी एक गंभीर अपघात घडला. कार आणि दुचाकी यांच्यात झालेल्या धडकेत दोन्ही वाहनांचे मोठे नुकसान झाले असून दुचाकी चालक जखमी झाला आहे. मिळालेल्या माहितीनुसार, दुचाकीस्वाराने अचानक कारला जोरदार धडक दिली.

धडकेत दुचाकी काही अंतरावर फेकली गेली तर कारचाही पुढील भाग मोठ्या प्रमाणावर नुकसानग्रस्त झाला. या अपघातात दुचाकी चालकाला गंभीर दुखापत झाली असून त्याला तातडीने रुग्णालयात दाखल करण्यात आले आहे.घटनेची माहिती मिळताच फोंडा पोलिसांनी घटनास्थळी धाव घेतली. त्यांनी पंचनामा करून अपघातग्रस्त वाहनं रस्त्यावरून बाजूला केली.