केपे: राज्यातील आरोग्य सुविधा लोकांच्या दारापर्यंत पोहचविण्याचा सरकारचा प्रयत्न आहे. आरोग्य सुविधांपासून लोक वंचित राहू नयेत, यासाठी आरोग्य खाते सर्व ती काळजी घेत असल्याचे आरोग्य मंत्री विश्‍वजीत राणे यांनी सांगितले. ते कुडचडे येथे कुडचडे आरोग्य केंद्रातर्फे आयोजित आरोग्य शिबिरात प्रमुख पाहुणे या नात्याने बोलत होते.यावेळी आमदार नीलेश काब्राल, नगराध्यक्ष प्रसन्ना भेंडे व इतर मान्यवर उपस्थित होते.

कुडचडे आरोग्य केंद्राला जरी जिल्हा हॉस्पिटलचा दर्जा दिला असला तरी अद्याप याठिकाणी सर्व सुविधा उपलब्ध करून दिल्या नसल्याने काहीप्रमाणात रुग्णांना त्रास होतो. पण येत्या दोन वर्षांत सर्व सुविधा लोकांसाठी उपलब्ध करून देण्यात येणार असल्याचे राणे यांनी सांगितले.

गोवा राज्य हे आरोग्य सुविधा देण्यास प्रथम क्रमांकावर असून कर्करोगाचे पूर्वीच निदान करण्यासाठी कार्यरत असून अशी अनेक आरोग्य शिबिर आयोजित केल्याने कर्करोगाचे पूर्वीच निदान केल्याने कित्येकांना खास करून महिलांना याचा फायदा झाला असल्याचे त्यांनी सांगितले.

पंतप्रधान नरेंद्र मोदी यांच्या सहकार्याने व त्यांच्या मार्गदर्शनाखाली हे काम सुरू असून लोकांना रुग्णवाहिका सहज उपलब्ध व्हाव्यात म्हणून आमचे प्रयत्न असल्याचे मंत्री विश्‍वजीत राणे यांनी यावेळी सांगितले.

यावेळी कुडचडे आणि परिसरातील रुग्णांनी मोठ्या संख्येने उपस्थिती लावली होती. तपासणी करून रुग्णांना योग्य सल्ला देण्यात आला.