शापोरा जेटीपासून समुद्रात दीड किलोमीटरच्या अंतरावर मासेमारी बोट उलटली. या बोटीवरील चौघांना दुसऱ्या एका मच्छीमारी बोटीवरील कामगारांनी वाचवले. बोटमालक चुडगो गावकर (68), कृष्णा गावकर (40), दसाराम (22) व संदीप (21) अशी वाचलेल्‍यांची नावे आहेत. यामुळे अनर्थ टळला.

सदर दुर्घटना आज गुरूवारी सकाळी दहाच्या सुमारास घडली. शिवोली येथील शापोरा नदीतून बोट अरबी समुद्रात मासेमारीसाठी गेली होती. मासेमारी करून माघारी येताना, वादळी लाटांमुळे ती उलटली अन् काही वेळातच बुडाली. त्यापूर्वी बोटवरील चारही जणांनी जीव वाचवण्यासाठी पाण्यात उडी मारली. हा प्रकार जवळून जाणाऱ्या अन्‍य एका मासेमारी बोटीवरील खलाशांच्या नजरेस पडला. लगेच त्‍यांनी धाव घेऊन चारही जणांना आपल्या बोटीमध्ये घेऊन बागा समुद्रकिनारी आणले.