सासष्टी: चांदर या गावाला ऐतिहासिक महत्त्व प्राप्त आहे. पूर्वी कंदब राजवटीच्या काळात त्याला चंद्रपूर असे संबोधले जात होते व कंदब राजांची ती राजधानी होती. या चांदर गावात प्राचीन महादेवाचे मंदिराचे अवशेष आहेत. काही वर्षांपूर्वी भारतीय पुरातत्त्व सर्वेक्षण खात्याने या मंदिराचे अवशेष सांभाळून काही प्रमाणात विकास केला. पण आता या मंदिराची पुनर्बांधणी करण्याची आवश्यकता आहे, असे मागणी इतिहासकार योगेश नागवेकर यांनी आज चांदर येथील या मंदिर अवशेषाला भेट दिल्यानंतर केली.

या मंदिराचे अवशेष सापडतात त्यात नंदिकेश्वर किंवा नंदी देवाचा पुतळा आहे.१९३० साली झालेल्या उत्खननाच्या वेळी या प्राचीन मंदिराचे अवशेष सापडले. त्यानंतर फादर हेंड्री हॅरीस यांनी आणखी उत्खनन केले व त्यांना तुघलक काळातील काही नाणी सापडली. जवळच असलेल्या विहिरीत नंदीचे मुख सापडले. फादर हॅरिस यांनी हे मुख मुंबईतील संग्रहालयात ठेवल्याची माहिती नागवेकर यांनी दिली.

मुहमद तुघलक व पोर्तुगीजांनी जे अत्याचार केले त्याची आठवण या मंदिराचे अवशेष करून देत असल्याचे नागवेकर म्हणाले. गोव्यातील कमळेश्र्वर, कपिलेश्र्वरी व तांबडी सुर्ला येथे असलेल्या महादेवाच्या मंदिराची पण हे अवशेष आठवण करून देत आहे, असे नागवेकर यांनी सांगितले.

चांदर येथील या महादेवाच्या मंदिराची पुनर्बांधणी करण्यासाठी ठोस पावले उचलली पाहिजेत असेही योगेश नागवेकर यांनी शेवटी स्पष्ट केले.