राष्ट्रीय महामार्गालगत पर्वरी येथे कॅसिनो निओ मॅजेस्टीक हॉटेलचे संचालक श्रीनिवास नायक यांच्यावर रात्री ८.४५ च्या सुमारास दोन अज्ञात बंदुकधाऱ्यांनी गोळीबाराच्या तीन फैरी झाडल्या. त्यातून नायक बचावले आहेत. ही घटना पर्वरी पोलिस ठाण्‍यापासून २०० मीटर अंतरावर घडली.

मिळालेल्‍या माहितीनुसार, बचावादाखल नायक यांच्या लकी नामक अंगरक्षकाने बंदुकीच्या तीन फैरी हल्लेखोरांच्या दिशेने झाडल्या. त्यापैकी गोळी हल्लेखोरांना लागली की नाही याविषयी माहिती मात्र मिळू शकली नाही; परंतु ते पळण्‍यात यशस्‍वी ठरले. कोणत्या वादातून वा कोणत्या कारणामुळे हा गोळीबार झाला, हे समजू शकले नाही. सीसीटीव्‍हीत संशयितांची छबी कैद झाली असून, दोन दुचाकी जप्‍त करण्‍यात आल्‍या आहेत, अशी माहिती मिळाली.