Caranzalem coastal area fire burns three boats

पणजी: करंझाळे येथील किनारपट्टी परिसरात आज दुपारी गवताला लागलेल्या आगीची झळ तेथे उभ्या करून ठेवलेल्या मच्छीमारी बोटींना बसली. तेथील पाच लाकडी बोटींपैकी तीन जळून खाक झाल्या, तर अग्निशमन दलाच्या जवानांच्या तत्परतेमुळे दोन बोटी वाचवण्यात यश आले. ही आग कशी लागली याची माहिती नसल्याचे अग्निशमन दलाच्या जवानांनी सांगितले. या आगीमागे घातपाताचा प्रकार असण्याची शक्यता नाकारता येत नाही.

करंझाळे - मिरामार येथील किनारपट्टीवर गेल्या अनेक दिवसांपासून या पाच बोटी पार्क करून ठेवण्यात आल्या होत्या. आज दुपारी तेथील गवताला आग लागली व काही क्षणात ही आग पार्क करून ठेवलेल्या लाकडी बोटींपर्यंत पोहचली. या आगीच्या घटनेची माहिती अग्निशमन दलाच्‍या नियंत्रण कक्षाला दुपारी ४ च्या सुमारास देण्यात आल्यावर पाण्याचे बंब त्या ठिकाणी पोहचले. त्यांनी लागलीच पाण्याची फवारणी व फोम वापरून ही आग विझवली. मात्र, तोपर्यंत तीन बोटी आगीत खाक झाल्या. या प्रकरणी पणजी पोलिसांनी घटनास्थळी धाव घेऊन पंचनामा केला. मात्र, या बोटींच्या मालकाने त्याला तक्रार द्यायची नसल्याचे सांगितले अशी माहिती पणजी पोलिसांनी दिली. या बोटी जीर्णावस्थेत असल्याने त्या तेथील झाडाझुडपात उभ्या करून ठेवण्यात आल्या होत्या.