कळंगुट: ओर्डा -कांदोळी येथील एका किराणा मालाच्या दुकानात शुक्रवारी सकाळी साडेअकराच्या सुमारास घरगुती गॅस सिलिंडरचा स्फोट झाल्याने लागलेल्या आगीत लाखो रुपयांचे नुकसान झाले. या दुर्घटनेत दुकानमालक लॉरेन्स परैरा आणि त्यांची पत्नी किरकोळ जखमी झाल्याची माहिती पिळर्ण येथील अग्निशमन दलाच्या जवानांनी दिली. जखमी दाम्पत्यावर सध्या कांदोळीतील एका खासगी इस्पितळात उपचार सुरू आहेत.

सकाळी साडेअकराच्या सुमारास दुकानातील गॅस सिलिंडरचा अचानक स्फोट झाल्याने परिसरात हाहाकार उडाला. नेमके काय घडले याची माहिती मिळत नसल्याने परिसरातील लोक घाबरले. या प्रकाराची माहिती अग्निशमन दलाला दिल्यानंतर दुपारी १२ वाजून २ मिनिटांनी पिळर्ण अग्निशमन दलाचे जवान घटनास्थळी दाखल झाले. त्यांनी सर्वप्रथम दुकानाला लागलेल्या आगीवर नियंत्रण मिळवत दुकानातील रिकामे सिलिंडर बाहेर काढले. यावेळी पिळर्ण अग्निशमन दलाच्या मदतीला म्हापसा तसेच पर्वरी येथून अग्निशमन दलाचे बंब तात्काळ दाखल झाल्याने आगीवर नियंत्रण मिळविणे सोपे झाले.