कळंगुट: गोव्यात अपघातांचे प्रमाण काही कमी होणायचे नाव घेत नाही. शनिवारी (दि. १ फेब्रुवारी) रोजी सकाळी एका खासगी बस आणि दुचाकीमध्ये झालेल्या भीषण अपघातात दुचाकीस्वाराने प्राण गमावला आहे. या अपघाताची माहिती मिळताच पोलीस घटनास्थळी दाखल झाले आणि सध्या या घटनेचा पुढील तपास सुरु आहे.

शनिवारी सकाळी ८-८:३० वाजताच्या सुमारास दुचाकी आणि एका खासगी बसमध्ये हा अपघात घडला. कलंगुट समुद्रकिनाऱ्यावर जाणाऱ्या जंक्शनवर हा अपघात झाल्याने शहरात हळहळ पसरली आहे. समुद्रकिनाऱ्याकडून येणाऱ्या रस्त्यावरून एक दुचाकी अतिशय भरधाव वेगाने येत होती आणि त्याच्याच थेट विरुद्ध दिशेने येणाऱ्या खासगी बसला तिने धडक दिली. समोरून येणारी ही बस दररोजच्या वेळेप्रमाणे बसस्टॉपच्या दिशेने जात होती. समोरून वेगेने येणाऱ्या दुचाकी चालकाला वाचवण्यासाठी बस थांबवली मात्र दुचाकी चालकाचा वेग प्रचंड असल्याने तो बसला धडकला आणि थेट शेजारी असलेल्या लाईटच्या खांबाला आपटला आणि गंभीर जखमी झाला. स्थानिकांनी वेळीच त्याला उपचारांसंसाठी पाठवले असता त्याला मृत घोषित करण्यात आले.

गोव्यातील एका खासगी बसला धडक दिलेली ही गाडी कर्नाटकमधली असून मृत दुचाकीचालक बंगळूर येथील असल्याची शक्यात आहे. सध्या कलंगुट पोलीस या अपघाताचा तपास करत असून बस चालकाला चौकशीसाठी पोलीस स्थानकात बोलावण्यात आलं आहे.