Theft at Azad Jama Masjid Bicholim

डिचोली: येथील मुस्लिमवाडा येथील आझाद जामा मशिदीत चोरीची घटना घडली. अज्ञात चोरट्याने मशिदीतील दानपेटी फोडून त्यातील पैसे लंपास केले. संशयित मशिदीत चोरी करतानाचे दृष्य सीसीटीव्हीत कैद झाले आहे.

मुख्य रस्त्यानजीक भर लोकवस्तीत असलेल्या या मशिदीत चोरी झाल्याने खळबळ माजली आहे. मशीद समितीने डिचोली पोलिसात तक्रार दाखल केली आहे. पोलिसांनी गुन्हा नोंद करून पुढील तपास चालवला आहे. चोरटा लवकरच जाळ्यात अडकणार, असा विश्वास पोलिसांनी व्यक्त केला आहे.

तिशीतील एक संशयित युवक सहजरीत्या मशिदीत शिरतो व तिथे कोणीच नसल्याची खात्री पटल्यानंतर दानपेटी फोडून पैशावर डल्ला मारून पळ काढतो, असे दृष्य सीसीटिव्हीत कैद झाले आहे. फुटेजवरून हा चोरटा परप्रांतीय असावा, असा संशय मशीद समितीचे अध्यक्ष नझीर बेग, सचिव बालाखान गोरी, मुस्ताफा बेग आणि अन्य पदाधिकाऱ्यांनी व्यक्त केला आहे. चोरट्याने दानपेटीतील नेमकी किती रक्कम लंपास केली, ते निश्चित समजू शकले नाही. मात्र हा आकडा २० हजाराहून अधिक असणार, असा अंदाज समितीने व्यक्त केला आहे.