गेल्या काही दिवसांपासून डिचोली परिसरात बिबट्याच्या वाढत्या वावरामुळे नागरिकांमध्ये भीतीचे प्रचंड वातावरण पसरले आहे. बिबट्याने पाळीव प्राण्यांवर हल्ले सुरु केल्याने ग्रामस्थांच्या झोपेचे खोबरे झाले असून, सायंकाळनंतर घराबाहेर पडणे कठीण झाले आहे. नागरिकांच्या वाढत्या तक्रारींची दखल घेत वनविभागाने तातडीने पावले उचलली आहेत. बिबट्याला जेरबंद करण्यासाठी वनविभागाने परिसरातील संशयास्पद ठिकाणी लोखंडी पिंजरा लावला आहे. तसेच, त्याच्या हालचाली टिपण्यासाठी ट्रॅप कॅमेरेही बसवण्यात आले आहेत. वनविभागाने स्थानिकांना सतर्क राहण्याचे आणि रात्रीच्या वेळी लहान मुलांना घराबाहेर न सोडण्याचे आवाहन केले आहे. वन कर्मचाऱ्यांची गस्तही वाढवण्यात आली आहे.