डिचोलीतील व्हावटी-कुडचिरे भागात कुत्र्यांचा संशयास्पद मृत्यू होण्याचे प्रकार घडत असून, याप्रकरणी गूढ निर्माण झाले आहे. विषबाधा की अन्य कारणांमुळे कुत्र्यांचा बळी जात आहे, ते अजून स्पष्ट झालेले नाही. मात्र, ‘रेबिज’ प्रतिबंधात्मक लस टोचल्यानंतर ही कुत्री मेल्याचा संशय व्यक्त करण्यात येत आहे.

रेबिज प्रतिबंधात्मक ‘लस’मुळेच कुत्र्यांचा बळी जात आहे, असा दावा व्हावटी येथील रत्नाकर गोवेकर आणि अन्य काही नागरिकांनी केला आहे. ‘मिशन रेबिज’ अभियानांतर्गत गेल्या १५ ऑक्टोबर रोजी व्हावटी परिसरातील पाळीव कुत्र्यांना रेबिज प्रतिबंधात्मक लस टोचण्यात आली होती.