Leopard Trap In Bicholim

डिचोली: डिचोली शहरात अपघातात जखमी झालेल्‍या ‘त्या’ बिबट्याला पकडण्यासाठी वन खात्याने पिंजरा लावला आहे. मात्र बिबट्या काही पिंजऱ्यात अडकलेला नाही की पिंजऱ्यापर्यंत आलेलाही नाही. त्यामुळे जखमी बिबट्याचे नेमके काय झाले, ते कळणे मुश्कील झाले आहे.

अपघातात जखमी झालेल्‍या बिबट्यामुळे परिसरातील लोकांमध्ये पसरलेली भीती वाढली आहे. कधी एकदा हा बिबट्या पिंजऱ्यात अडकतोय आणि आमची मुक्तता, असे लोकांना झाले आहे. अपघातानंतर त्या बिबट्याचे बरेवाईट झाले तर नाही ना? असेही बोलले जात आहे.

रात्रीच्‍या वेळी घराबाहेर पडणे झाले कठीण

अपघातात जखमी झाल्यानंतर त्याच अवस्थेत बिबट्या गायब झाला आहे. अपघातानंतर रात्रभर साष्टीवाडा परिसरात कुत्र्यांचे जोरजोरात भुंकणे सुरू होते. त्यामुळे हा बिबट्या त्‍याच परिसरात लपला असावा, अशी भीती स्थानिक व्यक्त करत आहेत. या बिबट्याच्या भीतीने काळोख पडताच घराबाहेर पाऊल टाकण्याचे धाडस लोक करत नाहीत.