डिचोली: येथे आयोजित महिला बुद्धिबळ स्पर्धेत स्नेहल नाईक ही ‘बुद्धिबळ क्वीन’ मुकुटाची मानकरी ठरली. उदया किशोर शेट्ये हिला उपविजेतेपद प्राप्त झाले. प्रशिला म्हापसेकर हिला तृतीय स्थानावर समाधान मानावे लागले.

जागतिक महिलादिनाचे औचित्य साधून आदिनाथ अकादमी आणि इनरव्हील क्‍लबच्या सहकार्याने नाईकनगर-बोर्डे येथील श्री सिद्धिविनायक देवस्थानतर्फे आज रविवारी (ता. ९) या स्पर्धेचे आयोजन करण्यात आले होते. बक्षीस वितरण सोहळ्यास प्रमुख पाहुणे म्हणून आमदार डॉ. चंद्रकांत शेट्ये, तसेच नगराध्यक्ष विजयकुमार नाटेकर, नगरसेवक नीलेश टोपले आणि दीपा शिरगावकर, डिचोली बुद्धिबळ संघटनेचे अध्यक्ष राजन कडकडे, डॉ. कौस्तुभ पाटणेकर, स्वप्‍निल दीक्षित, नीलेश धारगळकर, डॉ. ज्योती सावंत उपस्थित होते. मान्यवरांच्या हस्ते स्पर्धेतील विजेत्यांना बक्षिसे देण्यात आली.

कर्तृत्‍ववान महिलांचा सत्कार

या सोहळ्यात विविध क्षेत्रांत उल्लेखनीय कार्य केलेल्या ज्येष्ठ महिला जनी भागू ताटे, निवृत्त शिक्षिका शुभांगी बांदेकर, राधाबाई तेलंग, मधुरा मांद्रेकर, रती गावडे यांचा सत्कार करण्यात आला. उज्‍ज्वला आचार्य यांनी सत्कारमूर्तींचा परिचय करून दिला. बादलीत बाटली टाकणे स्पर्धेतील विजेत्यांना यावेळी मान्यवरांच्या हस्ते बक्षिसे देण्यात आली. सूत्रसंचालन नारायण बेतकीकर यांनी केले.