मोरजी: हरमल समुद्रकिनारी भागात मोठ्या प्रमाणात सीआरझेड विभागाचे उल्लंघन करून बेकायदेशीररीत्या केलेली बांधकामे पाडण्यास सध्या सुरुवात झाली आहे. २१६ बांधकामापैकी ९ बांधकामे काल व आज (बुधवारी) पाडण्यात आली.

मागच्या वर्षापासून हरमल समुद्रकिनारी भागात गिरकर वाड्यावरील परिसरातील बेकायदेशीर बांधकामाविषयी ही प्रकरणे न्यायालयात पोचली होती. त्यावेळी सरपंच म्हणून बर्नाड फर्नांडिस हे असताना या बांधकामांविषयी उच्च न्यायालयाने ही गंभीर दखल घेत सरपंचांच्या नातेवाईकासहित इतर कोणकोणती बांधकामे बेकायदेशीरपणे उभारली गेली, त्या सर्व बांधकामांवर कारवाई करण्याचे आदेश उच्च न्यायालयाने दिले होते. त्यानुसार एकूण २१६ बांधकामावर कारवाईचे संकेत प्राप्त झाल्यानंतर सध्या पेडणे मामलदार पेडणे गट विकास कार्यालयामार्फत बांधकामावर हातोडा टाकण्याचे काम सुरू झाले.

हरमल किनारी भागातील जॉर्ज डिसोझा ,अवेलिनो फर्नांडिस व इतरांची बांधकामे मोडून टाकली. उपसरपंच सोनाली माज्जी यांच्याकडे संपर्क साधला असता कालपासून उच्च न्यायालयाच्या आदेशानुसार बांधकाम पाडण्यास सुरुवात केली होती. काल आणि आज मिळून नऊ बांधकामे हटवण्याचे त्यांनी सांगितले.

हरमल गिरकर वाड्यावरील समुद्रकिनारी भागात बेकायदेशीर उभारलेल्या बांधकामावर चार आणि पाच या दोन दिवसांमध्ये एकूण नऊ बांधकामावर कारवाई करण्यात आली.

सी आर झेड विभागाचे उल्लंघन करत मोठ्या प्रमाणात बेकायदेशीर बांधकामे मांद्रे मतदार संघातील कीनारी भागात करण्यात आली होती. या संदर्भात विभागाकडे तक्रारी केल्यानंतर याची दखल न्यायालयाने घेऊन ही बांधकामे मोडण्याचा आदेश दिला होता.