Minister Ravi Naik About Agriculture Policy

सासष्टी: गोव्यासाठीचा कृषी धोरणाचा आराखडा तयार केला असून त्याची प्रत मुख्यमंत्र्यांना पाठवली आहे. या धोरणाच्या आराखड्यावर मंत्रीमंडळात चर्चा होईल व सर्व प्रक्रिया पूर्ण झाल्यावर धोरणाची अंमलबजावणी लवकरच केली जाईल असे कृषिमंत्री रवी नाईक यानी मडगावात सांगितले. आम्ही हे धोरण शेतकऱ्यांचे हीत जपुनच तयार केले आहे. या धोरणात अशा बाबी आहेत जेणेकरुन जास्तीत जास्त युवक कृषी क्षेत्राकडे वळतील याची खात्री आपल्याला आहे असेही मंत्र्यानी सांगितले.

गोवा हे लहान राज्य असून आम्ही आमच्या जमीनीचे रक्षण केले पाहिजे. ही जमीन पुढील पिढीसाठी राखून ठेवली पाहिजे, असेही ते म्हणाले. आता मुंबई व दिल्लीतील लोक गोव्यात जमिनी विकत घेण्यासाठी येत आहेत. गोमंतकीयांनी आपल्या जमिनी विकू नये असे आपण आवाहन करीत आहे असेही मंत्री नाईक यानी सांगितले. आम्ही बांधकामांवर सुद्धा नियंत्रण आणले पाहिजे. जर परिस्थिती अशीच राहिली तर गोव्याच्या पर्यावरणीय समतोल बिघडेल, असेही त्यांनी सांगितले.आज मडगावच्या रवींद्र भवनात रास्त भावाच्या दुकानदारांची बैठक आयोजित करण्यात आली होती. बैठकीनंतर ते पत्रकारांशी बोलत होते.