मडगाव: कोलवा येथे एका डेंटल क्लिनिकला आग लागून सुमारे चार लाख रुपयांची मालमत्ता जळून खाक झाली. शनिवारी सकाळी ९ च्या सुमारास ही दुर्घटना घडली. आगीचे नेमके कारण स्पष्ट होऊ शकले नाही. शॉर्ट सर्किटमुळे ही आग लागली असावी, असा प्राथमिक अंदाज मडगाव अग्निशामक दलाचे अधिकारी गिल सौझा यांनी व्यक्त केला आहे.

आगीची माहिती मिळाल्यानंतर दलाच्या जवानांनी घटनास्थळी जाऊन आग शमविली. क्लिनिकच्या रिसेप्शन काऊंटरमध्ये ही आग लागली. यात संगणक, पंखे, खिडकीची तावदाने आणि कपाटे जळाली.

या इमारतीत पहिल्या मजल्यावर हे क्लिनिक आहे. आगीचा धूर दुसऱ्या मजल्यावरील फ्लॅटमध्येही पसरला होता. हा फ्लॅट बंद होता. तेथे कुणी राहात नसल्याची माहिती मडगाव अग्निशमन दलाच्या कार्यालयातून देण्यात आली.