शाहरुख खानचा पठान सध्या बॉक्सऑफिसवर धुमाकूळ घालत आहे त्यानिमीत्ताने पश्तून पठान परंपरेवर चर्चा केली जातेय. कारण शाहरुख याच पश्तूनी परंपरेशी नातं सांगतो. पठानांची काही वेगळी गुणवैशिष्ट्ये सांगितली जातात.

काही ठिकाणी पठानांचा उल्लेख युद्धखोर असा केला जातो तर काही ठिकाणी पठानांच्या चिवटपणाचं कौतुक केलं जातं नेमकी काय आहे ही पठानांची गोष्ट आणि सुपरस्टार शाहरुखचं काय आहे नातं या पठान परंपरेशी?

यानिमित्ताने पठाणी किंवा पश्तून परंपरेची आठवण काढली जातेय. शाहरुख खानचे कुटूंब हे देशप्रेमी म्हणुन ओळखलं जातं.शाहरुखचं कुटुंब याच पश्तुनी परंपरेचा भाग आहे. त्याचे वडिल मीर ताज मोहमद खान पश्तून होते.

गांधीजींचे अनुयायी खान अब्दुल गफार खान उर्फ बादशहा खान यांना त्यांनी आपला नेता मानलं होतं. बादशहा खान यांच्या खुदा-ई-खिदमतकार या संघटनेचे ते सदस्य होते. पठानांचा नेता म्हणुन बादशहा खान त्यांची ओळख होती.

इतिहासाच्या पानांमध्ये पठाणांची प्रतिमा ही हिंसक, सूडबुद्धीचे असाच आहे. पठान मरण पत्करतील पण शत्रूपुढे झुकणार नाहीत असं म्हटलं जातं. बादशाह खान यांनी या झुंजार जमातीला अहिंसा शिकवली . बातमीत वापरलेलं फोटोत शाहरुखच्या हातात जे पुस्तक आहे ते खुदा- ई-खिदमतगारच्या आणि बादशाह खान यांच्या इतिहासावर भाष्य करतं. भारत सरकारने या कार्याबद्दल बादशहा खान यांना भारतरत्न हा सर्वोच्च नागरी सन्मान देऊन गौरव केला.

शाहरुखच्या अंगी असणारा झुंजार बाणा, नम्रपणा , कणखरपणा, परिस्थितीला अजिबात शरण न जाण्याची लढावू वृत्ती कुठून येते याचं उत्तर कदाचित त्याच्या पठानी परंपरेत मिळु शकेल. पठान चित्रपटाला विरोध करत असताना एका संताने तर शाहरुखला जिवंत जाळण्याची भाषा केली ;पण शाहरुखने आपला संयम सोडला नाही. त्याने बॉयकॉट ट्रेंडला आपल्या कामातुन उत्तर दिलं. शाहरुखचा या काळातला संयम खरंच वाखाणण्याजोगा होता.