Saif Ali Khan: बॉलीवूडचे कलाकार कोणत्या ना कोणत्या कारणाने नेहमीच चर्चेत असतात. कधी ते त्यांच्या चित्रपटामुळे तर कधी त्यांच्या वैयक्तिक आयुष्यामुळे चर्चांचा भाग बनतात. आता सैफ अली खान त्याच्या तब्येतीच्या कारणामुळे चर्चेत आला आहे.

बॉलिवूड अभिनेता सैफ अली खानला रुग्णालयात दाखल करण्यात आले आहे. सोमवारी सकाळी आठच्या सुमारास त्यांना कोकिलाबेन रुग्णालयात दाखल करण्यात आले असून, त्याच्या गुडघ्यावर शस्त्रक्रिया करण्यात येत आहे. अभिनेत्याच्या खांद्यालाही फ्रॅक्चर झाल्याचे सांगण्यात येत आहे. सैफसोबत त्याची पत्नी करीना कपूर खान देखील रुग्णालयात पोहचली आहे.

सैफ अली खानच्या गुडघ्याला आणि खांद्याला दुखापत झाली आहे. मात्र हे सर्व कसे घडले याबाबत कोणतीही माहिती समोर आलेली नाही. मिळालेल्या माहितीनुसार, त्याच्या गुडघ्याला आणि खांद्याला फ्रॅक्चर झाले आहे. खान कुटुंबातील कोणीही अभिनेत्याच्या दुखापतीबाबत अद्याप कोणतीही माहिती दिलेली नाही.

सैफ अली खान सध्या साऊथ चित्रपट 'देवरा'च्या शूटिंगमध्ये व्यस्त आहे. ज्युनियर एनटीआर आणि जान्हवी कपूरच्या या चित्रपटात तो 'बहिरा'ची भूमिका साकारत आहे. त्यामुळे शूटिंगदरम्यानच तो जखमी झाल्याचे म्हटले जात आहे.

मात्र तो जखमी झाल्याची ही काही पहिलीच वेळ नाही. याआधीदेखील सैफ शूटिंगदरम्यान अनेकदा जखमी झाला आहे. 'क्या कहना' चित्रपटातील एका सीनमध्ये बाईक स्टंट करताना सैफ अली खान जखमी झाला होता. आता अभिनेत्याच्या कुटुंबियांकडून किंवा अभिनेत्याने स्वत: खुलासा केल्यानंतरच तो नक्की कशामुळे जखमी झाला हे चाहत्यांना स्पष्ट होणार आहे.