Rajpal Yadav Cheque Bounce Case: बॉलिवूड अभिनेता राजपाल यादव याच्या चेक बाऊन्स प्रकरणाशी संबंधित सुनावणी सर्वोच्च न्यायालयात पार पडली. या सुनावणीदरम्यान न्यायालयाने राजपाल यादवला कडक शब्दांत फटकारले. त्याला येत्या 13 ऑक्टोबरपर्यंत तक्रारदाराला दोन कोटी रुपये देण्याचे स्पष्ट निर्देश दिले. जोपर्यंत हा संपूर्ण आर्थिक भरणा केला जात नाही, तोपर्यंत उच्च न्यायालयाच्या आदेशाविरुद्ध दाखल केलेल्या त्याच्या याचिकेवर सुनावणी केली जाणार नाही, असेही न्यायालयाने सुनावले.

सुनावणीसाठी राजपाल यादव स्वतः न्यायालयात उपस्थित होता आणि तो सोबत 1 कोटी 15 लाख रुपयांचा डिमांड ड्राफ्ट देखील घेऊन आला होता. उरलेली 85 लाखांची रक्कम त्याला 13 ऑक्टोबरपूर्वी तक्रारदाराला द्यावी लागणार आहे. सुनावणीदरम्यान सरन्यायाधीशांनी राजपालच्या वर्तनावर आणि कायद्याच्या दरोड्यावर तीव्र नाराजी व्यक्त केली. वारंवार मुदत देऊनही तक्रारदाराला त्याचे पैसे मिळत नसल्याबद्दल न्यायालयाने खडे बोल सुनावले. कायद्याचा या प्रकारे गैरवापर करणे योग्य नाही, असे निरीक्षणही न्यायालयाने नोंदवले.

सुनावणीच्या अखेरीस न्यायमूर्तींनी राजपाल यादव (Rajpal Yadav) याच्याशी संवाद साधताना मिश्कील टिप्पणी केली. राजपालला ‘अता पता लापता’ चित्रपटासाठी त्याला सुमारे 200 ते 250 कोटी रुपयांचे मोठे नुकसान सहन करावे लागले. यावर सरन्यायाधीशांनी टिप्पणी केली की, तुझ्या चित्रपटाचे नाव जसे ‘अता पता लापता’ आहे, तसेच तुझे पैसेही आता गायब झाले आहेत.

दरम्यान, राजपाल यादवच्या वकिलांनी न्यायालयाला माहिती दिली की, त्याने पैसे जमा करण्यासाठी रजिस्ट्रीशी संपर्क साधला, परंतु आरटीजीएस मान्य न झाल्यामुळे तो डीडी घेऊन आला आहे. तसेच त्याची मालमत्ता खरेदी करणारे ग्राहकही न्यायालयात हजर असून, व्यवहार पूर्ण झाल्यानंतर उरलेली रक्कमही लगेच दिली जाईल, असे वकिलांनी स्पष्ट केले.