Rajpal Yadav Smoking Room Demand In Jail: चेक बाऊन्स प्रकरणी तिहार तुरुंगातून बाहेर आल्यानंतर प्रसिद्ध अभिनेता राजपाल यादवने आपली भूमिका मांडली. दिल्ली उच्च न्यायालयाने त्याच्या शिक्षेला स्थगिती दिल्यानंतर राजपालने चित्रपटसृष्टी आणि प्रेक्षकांचे आभार मानले. तो म्हणाला की, कठीण काळात त्याला लोकांकडून भरभरुन प्रेम मिळाले. या प्रकरणातील कायदेशीर बाजू मांडण्यासाठी त्याने आपल्या वकीलांकडे बोट दाखवले असले तरी तुरुंगातील सुधारणांबाबत त्याने केलेली विधाने सध्या चर्चेत आहेत.

राजपाल यादवने (Rajpal Yadav) तुरुंग प्रशासनाकडे एक वेगळी मागणी केली. विमानतळावर ज्याप्रमाणे धूम्रपानासाठी स्वतंत्र खोल्या (Smoking Rooms) असतात, तशी सोय तुरुंगातही असावी, असे त्याने म्हटले. आपण तंबाखूचे समर्थन करत नसल्याचे स्पष्ट करतानाच त्याने कबूल केले की, त्याने स्वतः अनेकदा धूम्रपान सोडण्याचा प्रयत्न केला. तुरुंगात असणाऱ्या कैद्यांना अशा प्रकारच्या मूलभूत सुविधा मिळणे गरजेचे असल्याचे त्याचे मत आहे.

तुरुंग (Jail) सुधारणांबाबत बोलताना राजपाल म्हणाला की, तुरुंग हे गुन्हेगारांचे सुधार केंद्र असायला हवे. तिथे गेलेल्या व्यक्तीच्या वागणुकीत बदल होणे महत्त्वाचे आहे. मात्र, जे गुन्हेगार स्वतःला बदलण्यास तयार नाहीत, त्यांच्यासाठी कायद्याचा कठोर बडगा असायलाच हवा, असेही त्याने नमूद केले. 9 कोटी रुपयांच्या या चेक बाऊन्स प्रकरणात दिल्ली उच्च न्यायालयाने त्याला दिलासा दिला. त्याने तक्रारदाराकडे दीड कोटी रुपये जमा केल्याची दखल घेत न्यायालयाने 18 मार्चपर्यंत त्याच्या शिक्षेला स्थगिती दिली आहे.

राजपालच्या संकटाच्या काळात सोनू सूदसारख्या अनेक चित्रपट कलाकारांनी त्याच्या कुटुंबाला मदतीचा हात पुढे केला. याबद्दल कृतज्ञता व्यक्त करताना राजपाल म्हणाला की, त्याला लोकांची सहानुभूती नको तर थोडे काम आणि वेळ हवा आहे. भारतात राहूनच मेहनत करुन आणि आपली कमाई वाढवून तो ही सर्व देणी फेडू इच्छितो. या कठीण प्रसंगानंतर राजपाल पुन्हा एकदा जोमाने कामाला लागण्यासाठी सज्ज झाला आहे.