नाट्य शिक्षक आणि नामवंत नाट्य दिग्दर्शक प्रमोद म्हाडेश्वर यांना दूबई (Dubai) येथे नाट्य दिग्दर्शनासाठी आमंत्रित करण्यात आले आहे. दुबई येथील एज्युस्कॅन संस्था विशेष मुलांकरीता काम करीत असून या मुलांसाठी 'एक फैसला ऐसा भी' या नाटकाची (Drama) निर्मिती केली जाणार आहे.

जया सरकार यांनी या नाटकाचे लेखन केले असून 9 आणि 15 जानेवारी दुबई आणि अबुधाबी याठिकाणी नाटकाचे सादरीकरण होणार आहे. काही दिवस गोव्यातून (Goa) ऑनलायन तालीम दिल्यानंतर प्रमोद म्हाडेश्वर 1 जानेवारीला दुबईत (Dubai) पोचणार असून नाटक बसवण्याची पुढील प्रक्रिया पूर्ण करतील. दरम्यान आयोजित कार्यशाळेत नाट्य शिक्षणाचे धडेही ते मुलांना देतील.

मोर्ले -सत्तरी येथील प्रमोद म्हाडेश्वर कला अकादमीच्या स्कूल ऑफ ड्रामाचे विद्यार्थी असून सध्या गोवा सरकारच्या कला आणि संस्कृती खात्यात नाट्य शिक्षक म्हणून काम करतात. सत्तरीतील पिसूर्ले, अडवई, सावर्डे, नगरगांव आणि वाळपई या माध्यमिक शाळांमध्ये ते नाट्य शिक्षण देण्याचे काम पाहत आहेत. त्यांनी अनेक नाटकांमध्ये भूमिका केल्या असून अनेक नाटकांना दिग्दर्शनही केले आहे. कला अकादमी आणि गोव्यातील इतर संस्थानी आयोजित केलेल्या अनेक नाटकांत त्यांना उत्कृष्ट दिग्दर्शनाचे पुरस्कारही (Award) प्राप्त झाले आहेत. लोककला आणि नाट्य निर्मितीच्या क्षेत्रात अग्रेसर असलेल्या केरी-सत्तरी येथील विवेकानंद कला सादरीकरण मंचाचे ते संस्थापक आहेत.