गेले आठ दिवस मांडवी किनाऱ्यावर सुरू असलेल्या 52 व्या इफ्फीचा (IFFI) रविवार, 28 रोजी शानदार समारोप होणार आहे. उदघाटन सोहळ्याप्रमाणेच समारोप समारंभालाही बॉलिवूड (Bollywood) फिल्म इंडस्ट्रीमधील विविध कलाकार येणार असून यामध्ये प्रामुख्याने धकधक गर्ल माधुरी दीक्षित (Madhuri Dixit), ॲक्शन हिरो हृतिक रोशन आदींसह मान्यवर कलाकारांचे आकर्षण असणार आहे. तर ‘किंग्ज युनायटेड’ या आंतरराष्ट्रीय स्तरावरील ‘रॉक बॅण्ड’ ऑर्केस्ट्रामधून प्रसिद्ध गायक सुखविंदर सिंग यांच्या संगीत मैफलीने या समारंभाला चार चांद लागणार आहेत.

ताळगाव येथील डॉ. श्‍यामाप्रसाद मुखर्जी इनडोअर स्टेडियममध्ये दुपारी ४ वाजता हा समारंभ होणार आहे. या समारंभास केंद्रीय माहिती आणि प्रसारणमंत्री अनुराग ठाकूर, मुख्यमंत्री डॉ. प्रमोद सावंत, राज्यपाल पी. एस. श्रीधरन पिल्लई, ज्येष्ठ अभिनेते रणधीर कपूर, मनोज वाजपेयी आणि मान्यवर उपस्थित राहणार आहेत.

आंतरराष्ट्रीय स्पर्धा विभागात एकूण 15 सिनेमे असून यामध्ये तीन भारतीय सिनेमांचा समावेश आहे. त्यामध्ये दिमासा भाषेतील पहिल्याच सिनेमाचा समावेश आहे. उत्कृष्ट सिनेमासोबतच उत्कृष्ट दिग्दर्शक, अभिनेता, अभिनेत्री आणि प्रथम दिग्दर्शन आदी पुरस्कार देखील कोण पटकावणार हे स्पष्ट होणार आहेे.

यावर्षीचा इफ्फी हा गेल्या वर्षीप्रमाणेच हायब्रीड स्वरूपात होता. जगभरातील सिनेरसिकांनी त्याला खूपच सकारात्मक प्रतिसाद दिला. कोरोनानंतर होणारा हा पहिला सिनेमहोत्सव आहे. अशा अडचणीच्या काळातही उत्तमोत्तम सिनेमे दाखवल्याने रसिक अतिशय समाधानी असल्याचे दिसले.

- सुभाष फळदेसाई, उपाध्यक्ष, गोवा मनोरंजन सोसायटी.