बॉलिवूड अभिनेता रणवीर सिंहचा बहुचर्चित चित्रपट 'धुरंधर २' (Dhurandhar: The Revenge) सध्या बॉक्स ऑफिसवर विक्रमी कमाई करत असतानाच राजकीय वर्तुळातून त्यावर टीकेची झोड उठू लागली आहे. एआयएमआयएम (AIMIM) प्रमुख असदुद्दीन ओवैसी यांनी या चित्रपटावर तीव्र शब्दांत ताशेरे ओढले असून, याला निव्वळ 'बकवास' आणि 'प्रोपेगंडा' ठरवले आहे. विशेष म्हणजे, चित्रपट न पाहताच ओवैसींनी यातील आशयावर प्रश्नचिन्ह उपस्थित केले आहे.

ओवैसी यांनी चित्रपटाच्या लांबीवर आणि त्यातील संवादांवर टीका केली. "तीन तासांची बकवास पाहण्यासाठी माझ्याकडे वेळ नाही," असे म्हणत त्यांनी या चित्रपटात हिंसाचार आणि शिवीगाळ असल्याचा दावा केला. ओवैसी पुढे म्हणाले की, "हा चित्रपट पाहिल्यानंतर मनात प्रश्न येतो की मुसलमानांना शिव्या देणे इतके गरजेचे आहे का? आम्ही हैदराबादमध्ये म्हणतो की, अशा गोष्टी मनावर घेऊ नका, तर त्या 'मुर्द्यावर' (प्रेतावर) सोडा. आम्हीही तेच करत आहोत." त्यांच्या या विधानामुळे नवा वाद निर्माण होण्याची शक्यता आहे.

विकिपीडियावर 'प्रोपेगंडा' शब्दाचा पाऊस

चित्रपटावरून सुरू झालेला हा वाद आता थेट माहितीचा स्रोत असलेल्या विकिपीडियापर्यंत पोहोचला आहे. 'धुरंधर २' च्या विकिपीडिया पेजवर तब्बल ३० वेळा 'प्रोपेगंडा' या शब्दाचा वापर करण्यात आला होता. हे प्रकरण इतके ताणले गेले की खुद्द विकिपीडियाचे संस्थापक जिमी वेल्स यांना यात हस्तक्षेप करावा लागला. वेल्स यांनी स्पष्ट केले की, प्रोपेगंडासारख्या शब्दांचा उल्लेख लेखात असू शकतो, मात्र विकिपीडिया स्वतःच्या आवाजात किंवा तथ्य (Fact) म्हणून असा दावा करू शकत नाही. सध्या विकिपीडियावर या चित्रपटाची व्याख्या 'हिंदी स्पाय ॲक्शन-थ्रिलर' अशीच करण्यात आली आहे.

बॉक्स ऑफिसवर ११०० कोटींचा टप्पा पार

टीका आणि वादाच्या भोवऱ्यात अडकलेला असला तरी, 'धुरंधर २' प्रेक्षकांना खेचून आणण्यात यशस्वी ठरला आहे. चित्रपटाने अवघ्या ९ दिवसांत जगभरात ११२८.९९ कोटी रुपयांचा ग्रॉस बिझनेस केला आहे. भारतात या चित्रपटाने ७१५.७२ कोटींचे नेट कलेक्शन केले असून, नवव्या दिवशी ४१.५५ कोटींची कमाई केली आहे. जरी नवव्या दिवशी कमाईचा वेग थोडा मंदावला असला, तरी चित्रपटाने भारतीय चित्रपटसृष्टीतील अनेक मोठे विक्रम मोडीत काढले आहेत.