IFFI New Movie Premiere: बॉलीवूड अभिनेता रणदीप हुड्डा आणि अभिनेत्री इलियाना डिक्रुज यांच्या आगामी 'तेरा क्या होगा लवली' हा चित्रपट गेल्या काही दिवसांपासून चर्चेत होता. या चित्रपटाती या दोन्ही कलाकारांचा फर्स्ट लूक आता समोर आला आहे. या चित्रपटाचा ग्रँड प्रीमियर गोव्यात सुरू असलेल्या 53 व्या इंडियन इंटरनॅशनल फिल्म फेस्टिव्हलमध्ये होणार आहे. (Randeep Hooda Ileana D'Cruz Upcoming Movie)

53 व्या इंडियन इंटरनॅशनल फिल्म फेस्टिव्हलला पणजीत 20 नोव्हेंबरपासून सुरुवात झाली आहे. या फेस्टिव्हलमध्ये 25 नोव्हेंबर रोजी या चित्रपटाचा प्रीमियर होणार आहे. या चित्रपटाचे दिग्दर्शन बलविंदर सिंह जंजुआ यांनी केले आहे. त्यांनी रणदीपसोबत नेटफ्लिक्सची सीरीज 'कॅट'मध्येही काम केले आहे.

हरियाणाच्या पार्श्वभुमीवर घडणारी ही कथा आहे. रूपिंदर चहल, अनिल रोधन आणि कुणाल मांडेकर यांच्या सहकार्याने बलविंदर यांनी ही कहाणी लिहिली आहे. हा एक सामाजिक कॉमेडी चित्रपट असणार आहे. भारतातील गोऱ्या त्वचेचा हव्यास असलेल्या लोकांच्या मानसिकतेवर यातून भाष्य करण्यात आले आहे. या चित्रपटाचे नाव पुर्वी अनफेयर अँड लव्हली असे ठेवण्यात आले होते, नंतर ते बदलले गेले.

रणदीपने इन्स्टाग्रामवरून ही माहिती दिली आहे. दरम्यान, या महोत्सवातील आपल्या चित्रपटाच्या गाला प्रीमियरबाबत म्हणाला की, इफ्फीत प्रीमियरचा खूप आनंद आहे. पहिल्यांदाच या चित्रपटाचा दर्शकांना अनुभव घेता येईल.

दरम्यान, रणदीप आगामी काळात स्वातंत्र्यवीर सावरकर यांच्या बायोपिकमध्येही मुख्य भूमिका साकारत आहे. या चित्रपटाचे दिग्दर्शन महेश मांजरेकर करणार आहेत. या चित्रपटातील रणदीपचा लूकदेखील प्रसिद्ध झाला आहे.