बांदा: मुंबई-गोवा महामार्गावर (Mumbai-Goa Highway) बांद्यातील कट्टा कॉर्नर येथे राष्ट्रीय महामार्ग विभागाने मंजूर केलेल्या 600 मीटर लांबीच्या उड्डाणपुलाचे अंतिम रेखाचित्र तयार (Drawings of flyovers) करण्यात आले असून, याबाबत लवकरच केंद्रीय पातळीवर निविदा प्रक्रिया पूर्ण झाल्यानंतर प्रत्यक्ष कामाला सुरुवात करण्यात येईल असे राष्ट्रीय महामार्ग विभागाने (Department of National Highways) स्पष्ट केले आहे.

या प्रस्तावित उड्डाणपुलासाठी 80 कोटी रुपये तर सटमटवाडी येथील भुयारी बॉक्सवेलसाठी 20 कोटी रुपये मंजूर करण्यात आले आहेत. या दोन्ही कामांचे भूमिपूज मागील वर्षी 7 जुलै 2020 ला करण्यात आले होते. त्यानंतर जमिनीची खोदाई करून माती परीक्षण देखील करण्यात आले. परंतु त्यानंतर पावसाळ्यामुळे याचे चार महिने काम बंद ठेवण्यात आले होते. राष्ट्रीय महामार्ग विभागाचे उपअभियंता आय. एस. मणेर, सहाय्यक अभियंता दत्तात्रय जाधव यांनी या उड्डाणपुलाचे रेखाचित्र तयार करून ते रत्नागिरीतील विभागीय कार्यालयात पाठविले आहे. त्यानंतर अंतिम आराखड्याला राष्ट्रीय मार्ग रस्ते विकास महामंडळाने मंजुरी दिल्यानंतर या उड्डाणपुलाचे अंतिम रेखाचित्र तयार करण्यात आले आहे.

याबाबत लवकरच केंद्रीय पातळीवर निविदा प्रक्रिया राबवून प्रत्यक्ष कामास सुरुवात करण्यात येणार आहे. उड्डाणपुलाचे अंतिम रेखाचित्र स्थानिक बांदा ग्रामपंचायतीला देखील माहितीसाठी पाठविण्यात आले आहे.

मुंबई-गोवा महामार्गावरील सुरु असलेली अपघातांची मालिका या उड्डाणपुलामुळे काही प्रमाणात थांबण्याची शक्यता आहे. या महामार्गावर सामाजिक कार्यकर्ते संजय आईर यांनी 26 जानेवारी 2019 ला उपोषणाचे हत्यार उगारले होते. त्यानंतर याठिकाणी उड्डाणपूल करण्याचे आश्वासन राष्ट्रीय महामार्ग विभागाच्या अधिकाऱ्यांनी दिले होते. त्यानंतर सातत्याने आईर यांनी वरिष्ठ पातळीवर याचा पाठपुरावा करत याठिकाणी उड्डाणपूल मंजूर करून घेतला. आता याचा अंतिम आराखडा देखील तयार झाला असल्याने याचे काम लवकरच सुरु होईल.