पुणे सोलापूर मार्गावर (Pune Solapur Highway Accident) आज पहाटे विचित्र अपघात झाला असून, दोन भरधाव कंटेनर एकमेकांना धडकले आहेत. यानंतर शेजारीच असलेल्या एका कार आणि काही वाहनांना हे कंटेनर धडकले. या अपघातात एक नागरिक ठार झाला आहे.

पुणे सोलापूर राष्ट्रीय महामार्गावर उरुळी कांचन (ता. हवेली) ग्रामपंचायत हद्दीत आज पहाटे 05 च्या सुमारास हा भीषण अपघात झाला. अपघातात मृत झालेल्या व्यक्तीचं नाव समजू शकले नसून या अपघातात तीनही वाहनांचे मोठ्या प्रमाणात नुकसान झाले आहे.

मिळालेल्या माहितीनुसार, पुणे सोलापूर मार्गावर (Pune Solapur Highway Accident) पहाटे 05 च्या सुमारास एक कंटेनर पुण्याच्या दिशेने येत होता. त्चयावेळी मागून येणाऱ्या आणखी एका भरधाव कंटेनरने पाठीमागून जोडरदार धडक दिली. यावेळी चौकात उभ्या असलेल्या एका कारला जाऊन हा कंटेनर धडकला.

दरम्यान, अपघाताची माहिती मिळताच स्थानिक नागरिक घटनास्थळी दाखल झाले. त्यांनी या घटनेतील जखमी नागरिकांना तातडीने रुग्णवाहिकेतून उरुळी कांचन येथील खाजगी रुग्णालयात दाखल केले.

अपघात होताच उरुळी कांचन येथील कस्तुरी प्रतिष्ठानच्या सदस्यांनी व ग्रामस्थांनी तात्काळ रुग्णवाहिका उपलब्ध करून दिली. जखमींना तात्काळ उपचारासाठी उरुळी कांचन येथील खाजगी रुग्णालयात दाखल करण्यात आले आहे.

अपघात झालेल्या ठिकाणी वाहने व वाहतूक कोंडी मोठ्या प्रमाणात झाली होती. व वाहनांच्या लांबच लांब रांगा लागल्या होत्या. अपघातात अनेक वाहनांचे प्रचंड नुकसान झाले आहे.