सिंधुदुर्ग: धोकादायक तिलारी घाटात भीषण अपघात झाला आहे. ब्रेक फेल झाल्याने आयशर टेम्पो १०० फूट खोल दरीत कोसळला. यात ट्रकचा चक्काचूर झाला असून, दोन कर्मचारी गंभीर जखमी झाले आहेत. त्यांना उपचारासाठी चंदगड येथील रुग्णालयात दाखल करण्यात आले आहे. शनिवारी (२८ जून) दुपारी हा अपघात झाला.

मिळालेल्या माहितीनुसार, आयशर टेम्पो बेळगाव येथून दोडामार्गच्या दिशेने जात होता. यावेळी तिलारी घाटात टेम्पोचा अचानक ब्रेक फेल झाल्याने टेम्पो थेट १०० फूट खोल दरीत कोसळला. सुदैवाने यात कोणतीही जीवितहाणी झालेली नाही पण, दोन कर्मचारी गंभीर जखमी झाले आहेत. जखमी कर्मचाऱ्यांना उपचारासाठी चंदगड येथील रुग्णालयात दाखल करण्यात आले आहे.

अपघाताची माहिती मिळताच स्थानिक पोलिसांनी घटनास्थळी धाव घेत ट्रकमध्ये अडकलेल्या दोन कर्मचाऱ्यांना सुखरुपपणे बाहेर काढले.

दरम्यान, तिलारी घाट वाहतूकीसाठी धोकादायक मानला जातो. तीव्र उतार आणि वळण यामुळे या घाटातून वाहतूक जोखमीची असते. शिवाय पावसाळ्यात हा धोका अधिक वाढतो. यापूर्वी देखील घाटात अपघाताच्या घटना घडल्या आहेत.