नागपूर (Nagpur) शहरातील हुडकेश्वर पोलीस स्टेशनच्या हद्दीत चोरीची एक विचित्र घटना घडली आहे, याठिकाणी एका चोरट्याने घरफोडी केल्यानंतर घरात काहीच न मिळाल्याने, रागाच्या भरात मालकासाठी एक चिठ्ठी त्याने लिहिली आहे. भामट्याचं कृत्य पाहून पोलिसांनी देखील डोक्याला हात लावला. या प्रकरणी हुडकेश्वर पोलीस ठाण्यात अज्ञात चोरट्याविरोधात गुन्हा दाखल करण्यात आला आहे. घटनेचा पुढील तपास चालू आहे. (The thief got angry and wrote a letter to the owner)

नागपूर शहरातील हुडकेश्वर पोलीस ठाण्याच्या हद्दीत चोरीची एक घटना घडली. पण चोरट्याला (Thief) घरात काहीच मुद्देमाल न सापडल्यानं त्यानं घरातून निघते वेळी घरमालकाला उद्देशून कागदावर एक मेसेज लिहिला. संबंधित चिठ्ठीत त्यानं घरातून कोणताही मुद्देमाल चोरीला गेला नाही असं लिहीलेलं आहे. शिवाय संबंधित चिठ्ठीत त्यानं घरमालकाला 'भिकारी' देखील म्हटलं.

घटनास्थळी ही चिठ्ठी आढळल्यानंतर पोलिसांनी देखील डोक्याला हात लावला आहे. चोरट्याची ही चिठ्ठी सध्या सोशल मीडियात (Social Media) चांगलीच व्हायरल होताना दिसत आहे. तसेच अनेकजणांनी यावरती मजेशीर प्रतिक्रिया देखील दिल्या आहेत. धक्कादायक बाब म्हणजे घरात चोरी झाली असून तीन हजार रुपयांचा मुद्देमाल चोरीला गेल्याची फिर्याद घरमालकाने दिली. या प्रकरणी पोलिसांनी (Police) अज्ञात चोरट्याविरोधात विविध कलमाअंतर्गत गुन्हा दाखल केला. हुडकेश्वर पोलीस आरोपी चोरट्याचा शोध घेत आहेत.