Tesla Showroom Launch In India

जगभरात नावाजलेली इलेक्ट्रिक वाहन निर्माता कंपनी टेस्लानं अखेर भारतात अधिकृतपणे प्रवेश केला आहे. मंगळवारी (15 जुलै) मुंबईच्या वांद्रे-कुर्ला संकुलात (BKC) टेस्लाच्या भारतातील पहिल्या शोरुमचं उद्घाटन करण्यात आलं. या उद्घाटन सोहळ्याला महाराष्ट्राचे मुख्यमंत्री देवेंद्र फडणवीस आणि परिवहन मंत्री प्रताप सरनाईक प्रमुख पाहुणे म्हणून उपस्थित होते.

मुख्यमंत्र्यांच्या हस्ते झालेल्या या उद्घाटन कार्यक्रमात टेस्लाच्या वेगवेगळ्या मॉडेल्सची झलक कारप्रेमींना पाहायला मिळाली. शोरुममध्ये टेस्लाचे आकर्षक मॉडेल्स आणि अत्याधुनिक टेक्नॉलॉजनं सज्ज असलेली वाहनं कारप्रेमींना पाहता येणार आहेत.

उद्घाटनावेळी बोलताना मुख्यमंत्री देवेंद्र फडणवीस म्हणाले, “टेस्लाने मुंबईतील त्यांचं पहिलं एक्सपीरियन्स सेंटर सुरू केलं आहे. भविष्यात लॉजिस्टिक सेंटर आणि सर्व्हिस सेंटरही मुंबईत सुरू होणार आहे. टेस्लाच्या कार्सचं बुकिंग आजपासूनच या सेंटरमधून सुरू होत आहे आणि मुंबईत टेस्ला कार्स विक्रीसाठी उपलब्ध होणार आहेत, ही शहरासाठी मोठी आनंदाची बाब आहे.”

टेस्लाने भारतात त्यांच्या Model Y या लोकप्रिय इलेक्ट्रिक एसयूव्ही कारने एंट्री केली आहे. या कारची ऑन-रोड किंमत 61 लाख रुपये ठेवण्यात आली आहे. तर, रिअर-व्हील ड्राइव्ह व्हेरिएंटसाठी किंमत 59.89 लाख रुपये असल्याची माहिती रॉयटर्स या आंतरराष्ट्रीय वृत्तसंस्थेने दिली आहे.

टेस्लाची ही भारतातील अधिकृत सुरुवात केवळ विक्रीपुरती मर्यादित राहणार नाही, तर भविष्यात उत्पादन आणि असेंब्लीसाठीही कंपनी भारतात गुंतवणूक करण्याचा विचार करत आहे. मुख्यमंत्र्यांनीही टेस्लाला महाराष्ट्रात उत्पादन सुरु करण्याचे आवाहन यावेळी केलं.

टेस्लाच्या या एन्ट्रीनंतर भारतातील इलेक्ट्रिक वाहन क्षेत्रात स्पर्धा अधिकच तीव्र होणार आहे. टाटा, महिंद्रा, एमजी मोटर्स आणि ह्युंदाईसारख्या कंपन्यांसाठी हा मोठा टप्पा ठरणार आहे.