Mumbai Terror Threat: मुंबईत दहशतवादी हल्ला करण्याची धमकी देण्यात आली आहे. एनआयएला (National Investigation Agency) याबाबत धमकीचा ईमेल मिळाल्यानंतर देशातील विविध शहरांना सतर्क करण्यात आले आहे.

एनआयएने मुंबई पोलिसांनाही ही माहिती दिली आहे. पोलीस आणि इतर यंत्रणा अलर्टवर असून, याचा अधिक तपास केला जात आहे.

सूत्रांनी दिलेल्या माहितीनुसार, एनआयएच्या ईमेल आयडीवर धमकीचा मेल आला आहे, यात मुंबईत दहशतवादी हल्ल्याची धमकी देण्यात आली आहे. ई-मेल करणाऱ्या व्यक्तीने स्वत:चा संबध तालिबानसोबत असल्याचे सांगितले आहे.

तसेच, तालिबान संघटनेचा प्रमुख नेता सिराजुद्दीन हक्कानीच्या आदेशानुसार हे घडत असल्याचा दावा केला आहे.

धमकीच्या ईमेलची माहिती मिळताच मुंबई पोलिसांना याबाबत माहिती देण्यात आली. सध्या पोलीस आणि इतर एजन्सी याबाबत तपास करत आहेत आणि ईमेल कोठून पाठवण्यात आला याचा शोध घेण्याचा प्रयत्न करत आहेत. त्याचबरोबर देशातील विविध शहरांमध्ये अलर्ट जारी करण्यात आला आहे.

कोण आहे सिराजुद्दीन हक्कानी

सिराजुद्दीन हक्कानी हा तालिबानचा सर्वात धोकादायक गट हक्कानी नेटवर्कचा प्रमुख आहे. अफगाणिस्तानात तालिबानच्या पुनरागमनानंतर त्यांना कार्यवाहक गृहमंत्री बनवण्यात आले आहे. यासोबतच तो तालिबानमधील नंबर दोनचा नेता आहे.

तालिबानमध्ये हक्कानी नेटवर्कचा मोठा प्रभाव आहे. अमेरिकन तपास संस्था एफबीआयने हक्कानीच्या ठिकाणाची माहिती देणाऱ्यावर दहा दशलक्ष डॉलर्सचे बक्षीस ठेवले आहे.

गेल्या महिन्यातही आली होती धमकी

यापूर्वी जानेवारी महिन्यात मुंबईत दहशतवादी हल्ल्याची धमकी देण्यात आली होती. एका व्यक्तीने मुंबई पोलिसांच्या नियंत्रण कक्षाला फोन करून शहरात वेगवेगळ्या ठिकाणी बॉम्बस्फोट घडवून आणण्याची धमकी दिली होती.

1993 च्या धर्तीवर मुंबईत ठिकठिकाणी स्फोट घडवून दहशत माजवली जाईल, असे धमकी देणाऱ्या व्यक्तीने फोनवर सांगितले होते. 2 महिन्यांत हे हल्ले करू असे सांगण्यात आले होते.