MSRTC Bus Strike : एसटीचे राज्यशासनात विलीनीकरण व्हावे, यासाठी 8 नोव्हेंबरपासून संपूर्ण राज्यभर एसटी (MSRTC Bus) कर्मचाऱ्यांनी विनामुदत संप (Workers Strike) पुकारला होता. परिवहन मंत्री अनिल परब (Anil Parab) यांनी कर्मचाऱ्यांना कामावर परतण्याचे आवाहन केले होते. यासाठी कर्मचाऱ्यांना सुधारित श्रेणीनुसार वेतनवाढ देण्याचे आश्वासनही त्यांनी केले होते; तरीही कर्मचारी संपावर अडूनच होते.

पण काही दिवसांपासून हे चित्र बदलताना दिसत आहे. महाराष्ट्रात काही जिल्ह्यातून तुरळक वाहतूक सुरू झाली आहे. यातच परिवहन मत्र्यांनी दिलेल्या आश्वासनाप्रमाणे सिंधुदुर्ग विभागातील एसटी कर्मचाऱ्यांना नोव्हेंबर महिन्याचे वेतन सुधारित वेतन श्रेणी प्रमाणे देण्यात आले. त्यामुळे सिंधुदुर्ग जिल्ह्यातही कालपासून संपानंतर पहिली एसटी धावली. सिंधुदुर्ग जिल्ह्यातील कणकवली ते सावंतवाडी (Kankavali to Sawantwadi) अशी बससेवा काल दुपारी दोन वाजल्यानंतर सुरू केली होती.

आज दुपारी बारानंतर कणकवली ते फोंडा (Kankavali to Ponda) अशी बस सोडण्यात आली आहे. प्रवाशी जरी तुरळक असले, तरी बससेवा सुरू झाल्याने आता हळूहळू संपूर्ण एसटी वाहतूक पूर्ववत होईल अशी आशा प्रवासी वर्गातून व्यक्त होताना दिसत आहे.