शिवसेना खासदार संजय राऊत (Sanjay Raut) सध्या दोन दिवसांच्या नागपूर दौऱ्यावर आहेत. या दौऱ्यासंदर्भात महाराष्ट्र विधानसभा विरोधी पक्ष नेते देवेंद्र फडणवीस यांनी राऊतांवर बोचरी टीका केली. या टीकेला राऊत यांनी जाहीर सभेमध्ये उत्तर दिले. (Shiv Sena MP Sanjay Raut taunts Devendra Fadnavis)

“नागपूरच्या मातीमध्ये एक वेगळेपण आहे. ते नागपूरला वारंवार आले, तर त्यांना थोडी सुबुद्धी येईल", असे फडणवीस म्हणाले होते. राऊत यांनी पण हाच मुद्दा पकडून फडणवीस यांना टोला लगावला. ते म्हणाले, "फडणवीस यांना सुबुद्धी न आल्याने त्यांचे मुख्यमंत्रीपद गेले."

“जर तुम्हाला त्यावेळी सुबुद्धी आली असती की, शिवसेना (Shiv Sena) हा आपला मित्र पक्ष आहे. शिवसेना हा आपला हिंदुत्ववादी पक्ष आहे. आपण त्या मैत्रीच्या नात्याने राहिले पाहिजे ही सुबुद्धी आली असती तर आज आपण कदाचित मुख्यमंत्री असता. पण तुम्हाला दुर्बुद्धी सुचली आणि आम्हाला सुबुद्धीची अक्कल तुम्ही देताय," अशी बोचरी टीका राऊत यांनी केली.