सिंधुदुर्ग: सावंतवाडी-गोवा सीमेजवळ गेल्या काही महिन्यांपासून ‘ओंकार’ हत्तीच्या धुमाकुळामुळे स्थानिक नागरिकांमध्ये भीतीचं वातावरण पसरलं आहे. हत्तीला सुरक्षितपणे पकडून योग्य ठिकाणी पाठवण्याची मागणी नागरिकांकडून करण्यात येतेय. अशातच, आता महाराष्ट्राचे माजी शालेय शिक्षण मंत्री दीपक केसरकर यांनी ‘ओंकार’ हत्तीबाबत मोठं वक्तव्य केलंय.

दीपक केसरकर सांगितले की, ‘ओंकार’ हत्तीसह इतर सर्व हत्तींना जेरबंद करून लवकरच वनतारा येथे पाठवणार, या प्रक्रियेसाठी वनमंत्र्यांकडून हिरवा कंदील मिळालाय. येत्या आठवड्यात या संदर्भात अंतिम निर्णय घेण्यासाठी बैठक आयोजित केली जाणार आहे.

केसरकर म्हणाले, “हत्तीला योग्य ठिकाणी पाठविण्यासाठी सध्या सर्व तयारी सुरु आहे. आमचा प्रयत्न आहे की हत्तीला सुरक्षिततेने आणि नैसर्गिक वातावरणाशी जुळवून पुनर्वसन केंद्रात पाठवावे.”

याच संदर्भात, मंत्री विश्वजित राणे यांनी शनिवारी (२० सप्टेंबर) कर्नाटकचे वनमंत्री ईश्वर खांद्रे यांची भेट घेतली. या बैठकीत ‘ओंकार’ हत्तीच्या पुनर्वसनासाठी त्वरित पावले उचलण्याची मागणी करण्यात आली. मंत्री राणे म्हणाले की, हत्तीला सुरक्षित आणि योग्य ठिकाणी पाठवण्यासाठी जलद कारवाई होणे आवश्यक आहे.

राज्यातील आणि सीमावर्ती भागातील नागरिकांमध्ये दहशत पसरवणाऱ्या हत्तीला नियंत्रणात आणण्यासाठी जोरदार प्रयत्न सुरू आहेत. ‘ओंकार’ हा हत्ती मूळ कळपापासून विभक्त होऊन गोवा-महाराष्ट्राच्या सीमेजवळील भागात वारंवार हेलपाटे मारत आहे.

शेतकरी आणि स्थानिक नागरिक या हत्तीच्या धुमाकुळामुळे चिंतेत आहेत. विशेषतः बागायती शेती आणि केळीच्या बागांना मोठा तडाखा बसला असून, अनेक शेतकऱ्यांचे उत्पादन पूर्णपणे नाश पावल्याचे अहवाल आहेत. स्थानिक लोकांनी प्रशासनाकडे त्वरित उपाय योजण्याची अपेक्षा व्यक्त केली आहे.