वर्धा येथे होणाऱ्या 96 व्या अखील भारतीय मराठी साहित्य संमेलनाच्या अध्यक्षपदी ज्येष्ठ साहित्यीक नरेंद्र चपळगावकर (Narendra Chapalgaonkar) यांची निवड झाली आहे. अखिल भारतीय मराठी साहित्य महामंडळाची आज मंगळवारी वर्धा येथे बैठक पार पाडली. या बैठकीत नरेंद्र चपळगावकर यांची एकमताने निवड करण्यात आली.

नरेंद्र चपळगावकर मुंबई उच्च न्यायालयाचे निवृत्त न्यायाधीश आहेत. चपळगावकर वैचारिक लेखनासाठी प्रसिद्ध आहेत. वैचारिक लेखन करणारे एक संवेदनशील लेखक म्हणून त्यांची ओळख आहे. नरेंद्र चपळगावकर यांनी संघर्ष आणि शहाणपण, दीपमाळ, आठवणीतले दिवस आणि कायदा आणि माणूस यांसारख्या पुस्तकांचे लेखन केले आहे. त्यांना विविध संस्थांचे पुरस्कार मिळाले असून, त्यांनी अनेक संस्थांवर काम केले आहे.

'अखिल भारतीय मराठी साहित्य संमेलनाचे अध्यक्षपद हा मराठी भाषा आणि मराठी साहित्याबद्दल मत मांडण्याची मोठी संधी आहे, असं मी मानतो. ही संधी मला दिल्याबद्दल मी अखिल भारतीय मराठी साहित्य महामंडळाचे आभार मानतो.' अशी प्रतिक्रिया नरेंद्र चपळगावकर यांनी त्यांची निवड झाल्यानंतर दिली आहे.