Crime: लातूर शहराजवळील कातपूर या ठिकाणी माणुसकीला काळिमा फासणारी घटना घडली आहे. पुतणीला त्रास देत असल्याच्या कारणावरून चुलत सासऱ्याने आपल्या जावयाची हत्या (Murder) केली आणि पोलिसांच्या भीतीपोटी स्वत: गळफास घेत आत्महत्या (Suicide) केली.

पोलिसांकडून मिळालेल्या माहितीनुसार, उमेश देशमुख यांनी सोयाबीन विक्रीचे पैसे आल्यावर आपल्या मित्रांना आणि चुलत सासरे शिवाजी शिंदे यांना मद्य सेवनासाठी हॉटेलमध्ये बोलावले होते. आनंदाच्या भरात अति मद्य (Alcohol) प्राशन केल्यामुळे उमेश हा सासऱ्याने चालवायला घेतलेल्या साईधन लॉज येथे गेला. त्यावेळी उमेशची बायको आणि शिवाजी शिंदे यांची पुतणी देखील तिथे होती. त्यावेळी उमेश आपल्या पत्नीला त्रास देऊ लागला. याबाबत सासऱ्याने विचारणा केली असता, उमेश आणि शिंदे यांच्यामध्ये वाद सुरू झाला.

हा वाद एवढा विकोपाला गेला की जावई आणि सासऱ्यामध्ये हाणामारी सुरू झाली. आपल्या पुतणीला त्रास देतो म्हणून रागाच्या भरात शिंदे यांनी पडद्याच्या रॉडने (Rod) जावयाच्या डोक्यात जोरदार वार केला. यातच उमेश गंभीर जखमी होऊन जमिनीवर कोसळला. एकंदरीत चाललेल्या गोंधळाने आजूबाजूची लोक आली आणि त्यांनी हा सगळा प्रकार पाहिला.

यावर शिंदे यांनी आपली बाजू सावरत जावयाची चूक असल्याचे ते लोकाना सांगत होते. पण लोकानी लगेचच पोलिसांना बोलावले. याचवेळी पोलिसांच्या भीतीमुळे शिंदे यांनी लॉजमधीलच एका खोलीत स्वत:ला गळफास लाऊन घेत आत्महत्या (Suicide) केली. या घटनेचा पुढील तपास पोलिस करत आहेत.