मुंबई गोवा महामार्गावरील परशुराम घाट वाहतूकीसाठी आज पासून बंद असणार आहे. 25 एप्रिलपासूनते 25 मे पर्यंत सकाळी 11 ते सायंकाळी 5 वाजेपर्यंत म्हणजेच सहा तास घाट बंद असणार आहे. येथे सुरू असलेल्या चौपदरीकरणाच्या कामामध्ये अडथळा निर्माण होऊ नये आणि कामाला गती मिळावी म्हणून हा घाट बंद ठेवण्यात येणार आहे. तसेच पावसाळ्यापूर्वी धोकादायक भागातील काम पूर्ण व्हावे यासाठी घाट बंद ठेवण्याचा निर्णय जिल्हाधिकारी यांनी घेतला आहे. (Mumbai Goa Highway Latest News)

हा मार्ग बंद केल्यामुळे पर्यायी वाहतूक लाईट वेट चिरणी - आंबडस ते कळबस्ते - चिपळूण मार्गे वळवण्यात आली आहे. पर्यायी मार्गावरून वाह तूकीसाठी अडथळा निर्माण होऊ नये यासाठी अवजड वाहनांची वाहतूक पूर्णतः बंद ठेवण्याचा निर्णय घेण्यात आला आहे. (Parashuram Ghat Latest News)

परशुराम घाट चौपदरीकरणाच्या कामावेळी घाटाच्या वरच्या बाजूला असणाऱ्या दुर्गवाडी मधील 15 घरे व घाटाच्या खालच्या बाजूला मौजे पेढे गावातील कुंभारवाडी मधील 20 घरे, बौद्धवाडी मधील 7 घरे, घरभेवाडीतील 17 घरे, कोष्टेवाडीतील 12 घरे अशा एकूण 71 घरांना चौपदरीकरण कामावेळी व पश्चात कोणत्याही प्रकारचा धोका पोहोचणार नाही, याची दक्षता घ्यावी. पर्यायी वाहतूक मार्गावर वाहतूक कोंडी होऊ नये, म्हणून पोलिस अधीक्षक रत्नागिरी व उपप्रादेशिक वाहन अधिकारी रत्नागिरी यांनी योग्य ते नियोजन करून आवश्यक ते पोलीस चौकी, अधिकारी, कर्मचारी यांची नियुक्ती करावी, अशा सूचना देखील जिल्हाधिकाऱ्यांनी दिल्या आहेत.