शिवप्रतिष्ठानचे संभाजी भिडे (Sambhaji Bhide) एका महिला पत्रकाराला 'कुंकू लाव, मग तुझ्याशी बोलेन' असे वक्तव्य केल्याने वादात सापडले आहेत. संभाजी भिडे मुख्यमंत्री एकनाथ शिंदे (CM Eknath Shinde) यांना मंत्रालयात भेटून आल्यानंतर, त्यांनी एका महिला पत्रकाराला प्रतिक्रिया देण्यास नकार देताना हे वक्तव्य केले होते. या वक्तव्यानंतर महिला आयोगानं संभाजी भिडे यांना दुसऱ्यांदा नोटीस बजावली आहे. याचे उत्तर न दिल्यास पुढील कार्यवाही केली जाईल असे महिला आयोगाच्या वतीने म्हटले आहे.

संभाजी भिडे यांना बजावण्यात आलेल्या नोटीसमध्ये काय म्हटले आहे?

कपाळावर टिकली लावली नाही म्हणून महिला पत्रकाराशी बोलण्यास नकार देण्यामागील आपल्या भुमिकेचा खुलासा सादर करण्याचे निर्देश उपरोक्त पत्राद्वारे आपणास देण्यात आले आहेत. तथापी आपल्याकडील खुलासा अद्याप प्राप्त झाला नाही. पत्र प्राप्त झाल्यापासून दोन दिवसांत आपले उत्तर मिळेल, अन्यथा आपले काहीएक म्हणणे नाही असे गृहीत धरून एकतर्फी निर्णय घेण्यात येईल व पुढील कार्यवाही करण्यात येईल.

दरम्यान, यापूर्वी 2 नोव्हेंबर रोजी महिला आयोगाच्या वतीने संभाजी भिडे यांना नोटीस बजावण्यात आली होती. या नोटीसीला भिडे यांच्याकडून कोणतेही उत्तर न मिळाल्याने आयोगामार्फत दुसऱ्यांदा भिडे यांना नोटीस बजावण्यात आली आहे. भिडे यांनी टिकली वरून केलेल्या वक्तव्यबाबत त्यांच्यावर चौफेर टीका करण्यात आली होती.