Mumbai Goa Highway: महाराष्ट्राचे सार्वजनिक बांधकाम मंत्री रविंद्र चव्हाण यांनी शुक्रवारी मुंबई-गोवा महामार्गाची पाहणी केली. त्यांनी पळस्पे फाटा, वाखण, इंदापूर-कासू रस्ते आणि घाट बांधकामाच्या स्थितीचा आढावा घेतला.

पनवेल ते इंदापूर मार्गाचा पहिला टप्पा हा गणेशोत्सवाच्या पूर्वी पूर्ण होऊन एक मार्गिका सुरू होईल तर डिसेंबर 2023 अखेर पर्यंत पूर्ण मुंबई-गोवा महामार्ग सुरळीतपणे सुरू होईल असा विश्वास त्यांनी व्यक्त केला आहे.

त्यामुळे गणेशोत्सवाआधी मुंबईतून कोकणात येणाऱ्या चाकरमान्यांचा प्रवास सुखकर होणार आहे.

हायवेच्या कामातील सर्व अडथळे लवकरात लवकर सोडवून हा महामार्ग वेळेत पूर्ण करण्याचे सक्त निर्देश त्यांनी अधिकाऱ्यांना दिले. रविंद्र चव्हाण यांच्या या पाहणी दौऱ्याला पनवेल येथून सुरवात झाली होती तर झारप येथे दौऱ्याची सांगता झाली.

भर पावसात अधिकाऱ्यांसह चव्हाण यांनी कामाची पाहणी केली. अनेक वर्षे रखडलेल्या मुंबई-गोवा महामार्गाचे काम आता सर्वांशी समन्वयातून केले जात आहे. गणेशोत्सवापुर्वी एक मार्गिका कोणत्याही परिस्थितीत पूर्ण करण्यावर भर आहे. हे सिंगल लेनचे काम 100 टक्के पूर्ण होईल.

पनवेल ते इंदापूर हा 42 किमीचा पहिला सिंगेललेन सुस्थितीत आहे. 12 किमीमधील सिंगल लेनचे व्हाईट टॉपिंग झालेले आहे. उरलेलं काम गणपतीच्या अगोदर पूर्ण होईल. उरलेला कासूपासून 42 किमीचा रस्ता खराब आहे. त्याचेही काम लवकर करण्याचे निर्देश दिले आहेत.

मुंबई- गोवा महामार्गावरील कशेडी घाटाला पर्याय असणारा बोगदा वाहतुकीसाठी सुरु करण्याच्या दृष्टीने निर्देश अधिकाऱ्यांना दिले आहेत. कशेडी घाटातून दोन वर्ष बोगद्याचे काम सुरु होते. त्यापैकी एका बोगद्याचे काम पूर्ण झाले आहे.