दक्षिण मुंबईतील (Mumbai) एका गोदामाला गुरुवारी मध्यरात्रीनंतर भीषण आग लागली. यामुळे त्याच्या शेजारी उभी असलेली 14 वाहने जळून खाक झाली. एका अधिकाऱ्याने ही माहिती दिली. गोदामात बांबू व इतर साहित्य ठेवण्यात आल्याचे अधिकाऱ्याने सांगितले. या अपघातात कोणतीही जीवितहानी झाल्याची माहिती अद्याप मिळालेली नाही.

गिरगाव परिसरातील अंकुरवाडी येथील एका गोडाऊनमध्ये आग लागली , जी तळमजल्यावर ठेवलेल्या राळ, फेस, बांबू आणि इतर वस्तूंमध्ये पसरली, असे अधिकाऱ्याने पुढे सांगितले. गोदामाच्या कार्यालयाजवळ उभ्या असलेल्या सहा चारचाकी आणि आठ दुचाकी या आगीत जळून खाक झाल्याचे त्यांनी सांगितले. आगीमुळे गोडाऊनच्या तळमजल्यावरील संपूर्ण बांधकाम कोसळले.

घटनेची माहिती मिळताच अग्निशमन दलाचे अधिकारी घटनास्थळी पोहोचले आणि पहाटे तीनच्या सुमारास आग आटोक्यात आणण्यात आली. आगीचे नेमके कारण अद्याप समजू शकले नसल्याचे या अधिकाऱ्याने सांगितले.